Kreativitieti dhe ekuilibri janë pikat më të forta për një pastiçier që të jet i suksesshëm. Unë duhet të shkruaj në çdo recetë BALANCË me shkronja të mëdha, sepse kjo është ajo që ka të bëjë me ëmbëlsirat, ka të bëjë me të menduarit dhe të kuptuarit rrugën drejt elegantes dhe delikates. Sepse të krijosh një produkt, e në rastin tim ëmbëlsira, përtej faktit që nuk është e lehtë, por krijon një produkt i cili nuk konsumohet për "uri" dhe as për "hall", është një produkt që njerzit dëshirojnë ta shijojnë dhe të gjejnë veten në të, ose të gjejnë shijet e tyre të preferuara, ose të zbulojnë diçka që nuk e kanë provuar më parë. Qëllimi dhe fokusi im është shije e mirë. Nuk e shtyj veten të përgatis pjata për hir të industrisë globale, por të krijoj një mori shijesh të veçanta, elegante, delikate midis shijeve klasike dhe teknikave të reja duke ndërthurur shije, fruta, erza, brumëra nga shumë vënde të ndryshme të botës. Më pëlqen të eksploroj dhe mendoj se çdo pastiçier në kuzhinën e vet e bën, shumë ekperimente ndonjëherë shkojnë dëm, e shumë rezultate nuk janë ato që prisnim, por ky proces do përsëritet e përsëritet deri sa të shkojmë në një recetë e cila për ne do quhet e suksesshme, që funksionon dhe pëlqehet, dhe në fund të ditës shitet, pasi dhe si të punësuar apo dhe si të vetpunësuar në fund të ditës duhet të justifikojmë krijimet tona dhe ato të jenë fitimprurëse. Personalisht shpesh mundohem të dal nga e zakonshmja si psh: të përgatis një tartë limoni, me limon juzu nga Japonia, akullore me shije limoni filipinas, ose shembull tjetër: "opera cake" me shije orientale duke përdorur gardamom, susamin dhe cajin e zi.