Në fillimet e rrugëtimit tim, mbaj mend se si mahnitesha nga dija e profesorëve të mi gjatë leksioneve dhe seminareve që merrja pjesë. Fitimi i konkursit kombëtar të sommelieris në vitin 2019 më bëri të kuptoj një gjë shumë të rëndësishme: bota e verës është e pafundme dhe ndryshon çdo minutë, orë dhe ditë. Akoma ndihem si ai djalë i ri 18-vjeçar që sapo nisi udhëtimin si sommelier. Për të qenë një sommelier i mirë, duhet të kesh shumë cilësi, por më e rëndësishmja është të duash njerëzit dhe të kesh një lidhje të veçantë me ta. Nëse i sheh njerëzit vetëm si klientë, asnjëherë nuk do të bëhesh një sommelier i mirë. Në jetën e sommelierit, do të takosh klientë të ndryshëm, nga konservativët dhe të pasigurtët, deri te aventurierët dhe ndonjëherë edhe njerëzit me sjellje të papërshtatshme. Për të qenë efektiv, duhet të kuptosh klientin dhe të ndihmosh ata të gjejnë verën e duhur për ta. Duhet të fitosh besimin e tyre dhe t'i edukosh, pa i bërë ata të ndihen të poshtëruar apo të fyer.